التغذيه التكميليه للطفل

د. ولاء فرح أخصائى طب الأطفال وحديثى الولادة مستشفى النصر بورسعيد

سلام عليكم
نتكلم النهارده عن التغذيه التكميليه للطفل
سموها تكميليه ليه بقى؟؟؟؟
عشان الرضاعه الطبيعيه مكمله معانا ياجماعه لحد سن سنتين😍
طبعا هيبقى لينا بوستات ان شاء الله في الرضاعه الطبيعيه المطلقة اول 6 شهور وهنمشى مع بعض واحده واحده كده وبعون الله اغلب الامهات ان لم يكن جميعهم يرضعوا طبيعي😍😍
نرجع بقى لموضوعنا النهارده وهو سؤال كل أم نبتدي ندخل الاكل امتى؟؟
منظمة الصحه العالميه ياجماعه قالت نبتدي بعد ماالطفل يتم ست شهور من عمره واحنا بنمشي وراها طبعا واحنا مغمضين🙈🙈🙈…
الناس دي ياجماعه مبتهظرش ولما بتطلع Rec­om­mend
بيطلع بعد شغل سنين وأبحاث وقالوا ان ده السن المناسب لدخول الغذاء للطفل عشان من السن ده نسبة النزلات المعويه واالاسهال قلت بنسب محترمه فالناس دي ثابته ع موقفها ومش هتغيره بعون الله😁😁
كمان يا جماعه احنا لازم نحترم feed­ing skills والتطور الحركي للطفل اللي هندخله الاكل…الطفل في السن ده وزن رقبته وابتدى يقعد بمسانده وحركة لسانه كمان اتطورت نوعا ما😋
خلاص كده اتفقنا هنبتدي بعد ماطعمي طفلك تطعيم الست شهور
نبتدي ازاي بقى؟؟؟؟؟😉
نبتدي بالفاكهه او الخضار نختار صنف صنف…الصنف الواحد هنأكل منه من تلاته لاربعة ايام ونلاحظ ظهور أي اعراض حساسيه ع طفلك لو ظهرت لقدر الله هنوقف الصنف ده مؤقتا ونحاول ندخله في فتره لاحقه
هندي أد إيه.؟؟؟
هندي معلقتين او تلاته بالكتير…اه والله العظيم😁😁 زي مابقولك كده😉
حتى لو الطفل عايز وبيبصلي وانا باكل وبيصعب عليه😊
انتي أم جميله بس الموضوع باراحه ومننساش ان احنا معانا الرضاعه الطبيعيه اللي مهمه جدا برده قي الوقت ده🙏🙏
الموضوع ده يتكرر من مره لمرتين يعني وجبه واحده وممكن وجبتين مش أكتر من كده عايزينه يرضع اي اكل زياده هياخد من عدد الرضعات واحنا بنحافظ عليها متنسيش😉
هنأكل بالمعلقه بلاش موضوع الاكل في الببرونه ده ياجماعه عشان نريح دماغنا…انا عارفه انك مش كده خالص وان ابنك اهم حاجه عندك لازم يتعرف ع المعلقه ويعرفهاهتلاقيه بيطلع لسانه يتعرف عليها 😋😋..
الفاكههت تقشر وتتسلق وتضرب في الخلاط او طازجه الاكل يبقى مهروس وتدريجيا بنزود درجة صلابته
زي التفاح والكمترى والموز والكيوي والجوافه
الخضار زي الجزر والكوسه والبطاطس والبروكلي والبطاطا والسبانخ بدون اضافات لا ملح ولا بهارات…عايزين الطعم يبقى قريب لسه للبن
ممكن كمان نعمل مهلبيه بلبن الام ع فكره😋😋
بداية بقى من الشهر التامن للعاشر

بليله مضروبه بالخلاط
شوفان مع تمر مضروب بالخلاط
فول مدمس مقشر عليه معلقه صغيره زيت زيتون
جبنه قريش عليها معلقه صغيره زيت زيتون
بطاطس مسلوقه ومهروسه عليها معلقة لحمه مفرومه
كفتة فراخ مسلوقه + بطاطس
مكرونه مسلوقه عليها معلقة لحمه مفرومه
فراخ مسلوق مهروسه+حمص مسلوق مهروس +طماطم مهروسه
كبدة فراخ وارز مسلوق
البيضه كامله مفيش مشاكل
الزبادي تدخل مع الفواكه
مناالشهر الثاني عشر يتناول طعام المنزل
طبعا الالبان الجاموسي والبقري بعد سنه والعسل كمان ع سنه..دي موجز بسيط😂😂😂😂😂..وبعدين هنزلكوا ترتيب الوجبات
والعدد هيزيد ع اشهر التامن للعاشر من اتنين التلاته 
وع سنه من تلاته لاربعه 
وبعد السنه نزود اتنين سناكس
البوست طويل وانا ماليش والله في البوستات الطويله ومعاناه عشان يتكتب بس كله عشان خاطر عيون امهاتنا واطفالنا وتخت امركم في أي سؤال😘😘
مننساش ياماميز نشرب مايه بعد الاكل😊
دمتم في صحه انتم وأطفالكم😍😍😍

تعديل للبوست
ناس بتسأل ع شرب العصاير؟؟؟
طب مبدئيا ممنوع منعا باتا عصائر جاهزه من السوبر ماركت ولو هنعمل عصير يتعمل فريش في البيت بدون اضافة سكر ومنزودش عن 120 مل…ولو انه يفضل أكل الفواكه بكاملها مهروسه او يمسكها الطفل وده عشان خاطر نستفيد من الالياف اللي مهمه جدا لحركة الامعاء عند الطفل

  • Next Conference Port-Said Neonatology 15/10/2019