تغذية طفلك

دكتورة / ولاء فرح — أخصائى الاطفال وحديثى الولادة — مستشفى النصر بورسعيد

سلام عليكم…أزيك يامامي
هنلخص النهارده كل اللي فات ونركز ع نقاط مهمه👓

💠وجبة طفلك تكون غنيه بالطاقه والبروتين والفيتامينات والمعادن زي ماقلنا(حديد ‑زنك-فيتامين سي-فيتامين أ‑كالسيوم)

💠النقطه دي مهمه…قولنا هنأكل بالملعقه ونلغي الببرونه وندي فرصه لطفلك يتعرف ع الملعقه مش بس كده كمان يتعود ع التنسيق بين حركة الفم والبلع
أقنعك أكتر ياست الكل…العضلات اللي طفلك بيستخدمها في المضغ والبلع وحركة اللسان هي نفسها اللي بيستخدمها بعد كده في الكلام يعني انتي كده بتدربي ابنك ع الكلام👏

💠 شرب اللبن يكون جزء من الوجبه الأساسية مش نعتبره وجبه لوحده😉..يعني يتشرب بجانب الفطار مثلا

💠 السعرات الحراريه تكون عاليه في الوجبه خصوصا ان الأطفال حجم وجبتهم صغيره 
وهناك أصناف مرتفعه السعرات الحراريه زي الأفوكادو والموز والبطاطا والبيض والزيتون الأسود والألبان ومنتجاتها

💠مننساش بنعرض الصف الجديد من 11:15 مره ونصبر ونحترم الكيوز بتاعة طفلك علامات الجوع والاشباع ولما يشبع نوقف ومنغصبش عليه

💠 نعود الطفل ع عادات الأكل الصحيحه عشان ترتاحي بعد كده…نعرفه ان اليوم فيه ثلاث وجبات فطار وغدا وعشا ووقت الأكل هنقعد ناكل معاه ومدة الوجبه متزيدش عن 30 دقيقه وبعدها الاكل هيتشال من مكانه ومش نحطه تاني لحد مايجي ميعاد السناكس وبعدين الوجبه اللي بعدها.

💠 نبقى عارفين ان الطفل بعد السنه الأولى ليكون مزاجه متقلب في الأكل وتقل شهيته يعني يوم ياكل كويس واتنين لأ وده طبيعي لأن سرعة النمو بتقل
كمان تلاقيه يحب أكلات معينه وأكلات تانيه يرفضها ومش عايز يجربها وده برده طبيعي وميقلقش

💠 وقت الأكل مش معركه لازم نغلب فيها نحاول نخليه وقت جميل وتشجيع لطفلك ونعلمه مهارات جديده لو عايزين نقدم صنف جديد او صنف رفضه نقدمه مع حاجه بيحبها او نحطه في طبقك وتاكلي منه وهو هيحاول يقلدك😋😋

💠 موضوع الاختيار ده ظريف جدا جربيه..حطي نوعين أكل وهويختار بينهم وهيفرح جدا انه قرر حاجه بنفسه ونوعي تاني مره في الاختيار ومره في مره هتلاقيه بدأ يتحسن وياكل حاجات مفيده كتيره من الأكل😍😍

💠 بلاش عصاير وحلويات بين الوجبات ونرجع نشتكي من قلة الأكل احنا كده بنسد شهيته😉

💠 لو طفلك من النوع اللي بيسرح بلاش حاجات تاخد انتباهه زي التليفزيون مثلا ونخليه يركز وقت الأكل وياريت لو ليه أخوه وانتي وباباه (لمة العيله) تاكلوا معاه ده بيفرق كتير معاه وفي نفسيته😍😍😍

💠 سوء التغذيه من أهم المخاطر اللي بتأثر ع صحة الطفل ومناعته وبتأثر ع الطول بشكل كبير

💠 متابعة وزن الطفل وطوله ع منحنى النمو لمتابعة كفاءةالتغذيه دي وسيله مهمه جدا جدا🙏🙏
😘طولت عليكم…😍😍
**دمتن في صحه أنتن وأطفالكن😘

  • Next Conference Port-Said Neonatology 15/10/2019